මතකයක් යට හිඳ..!

දුරක් යන්නට අතක් පටලන්
එකට අත්වැල් බැඳ තියා
යන්න හැදුවට පොඩි තරහකට
ඒ බැන්ද වැල් ගිලිහී ගියා

වසර කීපෙක කතා පිටුවක
නවකතාවක මිහිරැති 
ලියූ දෑ මතකයට නංවනු
කෙලෙස කරමිද කඳුලැතී

තරහවක තුල පිපිරී යන්නට
නොකල දේ චෝදනා කරන්නට
කෙලෙස හිත ගත්තේද මිතුරිය
වරදටත් පෙම් කරපු එකෙකුට 

ජීවිතේ නුඹ සුවෙන් සිටිතැයි
හදවතින් මම විමසමි
එහෙත් ඒ බව අසන්නට වත්
කිසි දිනක නොම අමතමී

බොහෝ තැන් වල වැටී විසිරුණු
මතක පැල දැන් වනස්පති වෙති
යනෙන ගමනේ ඉඳහිටක මම
මතකයක් යට ගිමන් හරිනෙමි 

2022 වප් මස දී ය.

සමහර දෑ

 හදවතින් හදවතට එක් වන
රහස් වැනි සමහර දේ ඇත
කිසිවක් කිසිවෙකුට නොකියන
උනුන්‍ට හැර තවකෙකුට නොදැනෙන 

❤️

පුතා..!

කට ඇරියොත්
රැඩිකල් කතාය
බලන්නේ අලුත් ඇසින්
දේසපාලනේ දෙසය
නිතර ඇසෙන්නේ
විකල්ප සින්දුම ය
නන්දසිරිලාට එදිරිසිංහලාට
එතන ඉඩ කොයිබද?

එහෙව් පුතා තවමත් යයි
අම්මා පස්සෙන්
සෙනසුරාදා පොලේ
පන්මල්ල අතින් ගෙන
අම්මට බර දෙන්නට
දුකින්

පුත්තු එහෙමය
ලෝකය රැඩිකල් වූ
නමුදු
හදවතේ අම්මාය

තවම නොදුටු ඒ රුවැති "සිසිල්" කවිපොත


කියවන්නට බොහෝ දෑ
තිබුනත්
පිටකවරයට ආසා කරන
රුවැති "සිසිල්" කවි පොත
මටම ලියවුණක් දැයි
විටෙක සිතෙන තරමට ම
බොහෝ උණුසුම් කතන්දර
සිසිල්වට කවි කර
ලියා ඇති!

කියවත්දී වහින්න
කොපි බඳුන් අත
රැඳෙන්න,
අඩුගානේ පින්නවත්
හමන්න..!!
කවිය බොක්කේ වදින්නේ
එතකොටලු..!

බැරි වුනත් ගිටාරය වයන්න
මමත් ආසයි කවි පද මුමුණන්න
ආපහු දවසක පොතක් ලිව්වොත්
මමත් එනවා එකක් ගන්නට..,
එතෙක්
රුවැති සිසිල් කවිපොතට
වෙන් කරපු ඉඩ
පිළිගන්න!!

කාංචනා අමිලානි කරුණාමුණි "බූමරංගය ඔබේ ඇස් දෙක " කවි පොත පාඨකයන්ට තිලිණ කර දින පහකි. එහෙන් මෙහෙන් ඇහැට හමුවූ කවි හැරෙන්නට තවමත් පොත ලබාගන්නට නොහැකි වූ හෙයින් ඒ නොඉවසිල්ල මෙසේ කවි කර බුකියේ තබමි.
~2017 බිනර මස~

රූපය : බූන්දියෙන් 

කවිය තවමත් අවසන්ව නැත

නුදුරු දිනයක සිත වැළඳ ගත්
එදා නුඹ වෙත අදත් තවමත්
රහසින්ම නොකියාම කිසිවක්
ලියමි පෙම් කවි දහස් ගණනක්

කොහේ යන්නද දුක කියන්නට
ගත මරන්නද සිත් බිඳීන්නද
නොහැකි ඈ හට දුකක් දෙන්නට
යවමි පා කර සුසුම් ගුවනට

මුදා විසිකොට පැරණි මතකය
වෙන්ව යමි දිවි තිබෙන තැනකට
නොපිපි තරුවට පෙම් කරපු මම
පියඹ යමි අද ගගණ සිවු දෙස
Return top | ඉහත්තාවට නැවතත්