හාදු හොරකම

 
 
එල්ලය බලා වෙර දමා අහසට
උඩට විසි කල ඇගේ හාදුව
මාවතේ තනිවම ගමන් ගිය
වැදුනා මාගේ ලලාටය මත

අයියේ මාගේ හාදුවක් ඔබේ
නළලේ වැදීලා විසි උනාදෝ
දුටුවා නම් විසිවූනු ඉසව්වක්
තරහා නැතුවම කියනවාදෝ

නංගී මම හරි කලබලෙන් වැඩ
පොලට යන මග ඉන්නේ දරුවෝ
වැඩ ඇරිලා මම නැවත එනවිට
හොයනකම් ඔබ ඉන්නවාදෝ

අනේ අයියේ කොහොමටත් බැහැ
එක මාගේ එකම හාදුව
ඔහුට දෙන්නයි හිටියේ මම එය
උඩ දමා නැති නොවුනා නම් හෙට

මක්කරන්නද එහෙම නම් මම
අලුත් හාදුව මගෙන් දෙන්නද
මගේ අතේ තව දුසිම් ගානක්
තරමටම ඇත හාදු ඉතුරුව

එක්වරම එය ඇසු යුවතිය
තරහකින් මා දේස බලා
ඉවත් වී ඒ සඳලුතලයෙන්
මැකී නොපෙනී ගියා

එල්ලය බලා විසිකෙරුව කල
උඩට විසි වූ ඇගේ හාදුව
නළලතේ වැදිලා තදින් වැර
වැටුනේ මාගේ සාක්කුවට ම

කිව්වේ නැහැ මම ඇගේ හාදුව
මගේ සිත මත සුරැක ඇති බව
හදිසියේ ලැබුණා උනත් මට
වටිනවා මහා මෙරක් තරමට
 
සේයාරූ : Andy Barter

ගංතෙරට පෙම්බැඳ


ඉවුරු අයිනෙන් සෙමෙන් පදවා
ගඟ දියෙන් මංපෙතක් අසමින්
පදවයි තොටීතැන සිය පහුර
යුහුසුළුව පෙරමුණට

කෙනෙකු අත වැනුවොත්
හිසින් සන් කළහොත්
වහා නවතා ඉවුර අසබඩ
තොටීතැන ඔහු වෙතට ඇවිදින

කිමද මා හට හිසින් සන් කර
එන්ට කියවා නිහඬ වන්නේ
එසේ අසලා මිතුරු වී ඔහු
විටෙක පහුරින් ගොඩකරන්නේ

සොවක් ඇති වූ කලෙක වරුවක
කඳුළු ගනීමින් ගංතෙරේ හිඳ
විටෙක ගසකට පහර දී ඔහු
හඬනු දුටුවා තදින් දුක්ගෙන

ජීවිතය නම් ගඟේ පදවන
මගේ පහුරත් නිතර පාවෙන
ආදරේ නම් ඉවුර අසබඩ
විටෙක නවතා ඔහේ ඇවිදින

පෙම් ඉවුරු මත වැවී ලොකුවන
විරහ දුක නම් මහා ගසකට
වැරෙන් තඩි බා මමත් හැඬුවා
මීට මහ කල්පයකටත් පෙර

අනේ මචං **සාර

මාලනි බුලත්සිංහලගේ "අනේ පුංචි කාලිදාස" ගීතයේ තාලයට ගායනා කරන්න.
අසා නැත්නම් ගීතය මෙතනින් ගන්න.
 
අනේ මචං නානසාර...
ගිරි පුප්පා කියන වීර කතා...
අහං ඉන්න බෑ...
මට වටරැක විජිත වෙන්න බෑ...

පත්තරයේ තීරු පෙළේ
රූපවාහිණී අතරේ..
තවුසන් තඩි ටෝක් දීදී...
නටයි ජවනිකා..
ජාතිවාදේ මනෝරංග සිහිනය නපූරුයි...

අනේ මචං නානසාර...
රජපවුලේ දෙටු කුමරුන්
එක්කලා හුරතල් වෙනහැටි
හරිම සුන්දරයි...

අනේ මචං නානසාර...
ගිරි පුප්පා කියන වීර කතා...
අහං ඉන්න බෑ...
මට වටරැක විජිත වෙන්න බෑ...

අනේ එපා වෙනස් වෙන්ට...
බොදු බලේ වැටේවි...
දෙකක් දාං කාරෙක එළවන්ට ගනීවී...
එහෙම උනොත් රජ මැදුරේ ගිනි ඇවිලේවී...

අනේ මචං නානසාර...
කාලය ඉගිලිලා යන්නේ...
වජ්‍රා අතේ තියෙන අයට,
එරෙහි නෙවෙන් බං...

අනේ මචං නානසාර...
ගිරි පුප්පා කියන වීර කතා...
අහං ඉන්න බෑ...
මට වටරැක විජිත වෙන්න බෑ...


Social Mechanism




අතීතයේදී
අතුරුදන් වූ බෝ දෙනා
ඉඳහිට හෝ
හමුවීමට නියමිත ව ඇත
එනමුදු අපට
ඔවුනව මතක නැත
අප හිතට
බලපෑම් කලවුන් හැරෙන්නට

වර්තමානයේ
හමුවීමට නියමිත බෝ දෙනා
අනාගතයේදී
අතුරුදන් වීමට නියමිත ව ඇත
එනමුදු අපට
ඔවුනව කෙටිකලකට
මතක සිටිනු ඇත
අප හිතට
බලපෑම් කලවුන් තරම් නොවුනට

සමාජ යාන්ත්‍රණය යනු එයයි.

තනිකම ද කවියකි

යනෙන තැන මරුවැල්ය
ආදරේ ගිනිදැල්ය
ජීවිතය නැතිකල්ය
දැනෙන්නේ තනිකම්ය

සිත් අහස ගැබ්බරද
අත් පසුර හිස්වුනිද
නෙතු කැල්මේ කඳුලැල්ද
ප්‍රේමය ම මියගොස් ද?

අවට ලොව නොම සිතන්
අතීතය අත හරින්
ප්‍රේමයේ සුභ දකින්
ජීවිතය කියවපන්..! 

පසුව ලියමි►
මෙයට කලකට පෙර "කළු දිය පොකුණ" බ්ලොග් අඩවියට දැමූ කොමෙන්ටුවකි, ඉහතින් ඇත්තේ. රචිකාවිය අලුත් ලියමන් කර ඇති දැයි දකිනු රිසියෙන් එහි යත්දී අහමබයෙන්  පෙර වසරේ වෙසක් මස සත් වන දින අකුරු කල මේ කවි[?] පෙල දුටු විට එය මා බිතෙහි යළි ලියා තබන්නට වූ ආශාවේ ප්‍රතිපලයයි මේ..

•තරු පුළිඟු•

මම දුර තියා
තරුවකට පෙම් කලෙමි
එහෙත් ලංවන තුරු
ඒ නුඹේ දුම්වැටියෙන්
පැන ආ පුළිඟුවක් බව
නොදත්තෙමි.

මැදින් අවසන් කර්ම චක්‍රය


ආදරය ද මේ..?

නොවැලැක්විය හැකි
හේතුවකින්
වැලැක් වූනු යමක් වේද
ඒ අපගේ ආදරයම
හැර අන් කිම??
Return top | ඉහත්තාවට නැවතත්